འབྲུག་ནས་བཙན་པོ་དྲན་པ།

སངས་རྒྱས་སྐྱབས།

ང་དྭ་ཕྲུག་ཅིག
སྤྲང་ཕྲུག་ཅིག

ཡང་ན ཁྱི་ཕྲུག་བཞིན
མིག་ཅེར་རེ
སྐྱོ་ལྷང་ངེར
མཆི་མ་ཤག་ཤག་ངང 
གངས་ལྗོངས་ཀྱི་ས་སྣེ་འདིར་ལངས་ནས
ཆག་འཇིག་ཤོར་བའི་སྙིང་གསོན་པོ་དེ་དང
འཆི་ལ་ཉེ་བའི་རྣམ་ཤེས་རྟ་རྔ་ཙམ་བོ་འདིའི་ཆེད་དུ
ངས་སྐྱབས་འཇུག་ཡང་ཡང་ཞུ
ཕོ་བྲང་ནང་རྨ་ཁ་ཤོར་བས་
གྱེན་ལངས་ཀྱི་ལོ་ཟླ་དེ་ནས
འོད་ཀྱི་སྲུང་དགོས་བྱུང་ལ ཡུམ་ལ་ཡང་བརྟེན་དགོས་བྱུང
འོད་སྣང་དང་ཡུམ་ཆེན་གྱི་བར་ནས་ཁྱོད་ཀྱི་བུ་རབས་ཚ་རྒྱུད་ཚོས
འདར་སིག་སིག་གི
མི་ཡུལ་ཞིག་བསྐྲུན་མགོ་ཚུགས
དེ་ནས་བཟུང ང་ཡུལ་གྱར་བའི་ལས་སུ་བཀོད་པ་ཤེས
ལས་དབང་ལ་འཁང་ར་བྱེད་བཞིན
རྐང་ཐང་གིས་ཧི་མ་ལ་ཡའི་རི་རྒྱུད་བཅད
ཧི་མ་ལ་ཡའི་བྱང་དང་ལྷོ་རྒྱུད་དུ ངའི་མེ་པོ་ཚོས་ཚེ་སྲོག་གི་མཆོད་སྦྱིན་མཛད་པས
ཁྲག་གིས་བསྐྲུན་པའི་རྐང་ལམ་ཕྲ་མོ་དེ
ངའི་ཚེ་མཇུག་གི་མལ་སྟོན་དྲོན་མོ་དེ་ཡིན
དེ་བས་ང་ཁྱི་སྨྱོན་བཞིན
སྤྱང་ལྟོགས་བཞིན
གཞི་བདག་བཞིན
ཧི་མ་ལ་ཡའི་རི་གསེང་ཉུལ
བཙན་པོའི་སྐུ་རྗེས་དང ཡང་ན་བཙན་པོའི་ཞབས་རྗེས
ཐ་ན ལྷ་སྒྲུང་ཞིག་ཡིན་དུ་ཆུགས་མོད
ངས་འཚོལ་ཉུལ་བྱས
ཁྱོད་ཀྱིས་མཐའ་འདུལ་དང་ཡང་འདུལ་གནང་བ་བདེན་ཡང
དེ་རིང་མཐའ་ཤོར་ཡང་ཤོར
ཕ་ཤོར་བུ་ཤོར་འདིས
དོན་གྱིས ཡོད་ཚད་ཤོར་བས
ངས་ཁྱོད་དྲན་བྱུང
ཁྱོད་རང་དྲན་དྲགས་པས
ཕ་ས་ལག་མཐིལ་ཙམ་མེད་ཀྱང
རྣམ་ཤེས་ཕྲ་མོ་སྲིན་མོ་གན་རྐྱལ་ལ་ཆགས་ཡོད
ཁྱོད་རང་དྲན་དྲགས་པས
ཧོ་ལན་རི་རྒྱུད་ནས་ཧི་མ་ལ་ཡའི་ལྷོ་ངོས
ཨམ་ཞི་སྡེ་བཞི་ནས་ལི་ཡུལ་བར་ལག་ཉུལ་བྱས
ཁྱོད་རང་དྲན་དྲགས་པས
ང་གངས་ལྗོངས་དང་བྲལ་ལ
ཕུ་ནུ་མིང་སྲིང་རྣམས་དང་ཡང་གསོན་བྲལ་བྱས་ཡོད
ཡིན་ཡང་ལྷ་བཙན་པོའི་ཁྲག་རྒྱུན་ལས་ཆད་པའི་ཁྲག་ཐིགས་དེས
ངའི་རྣམ་ཤེས་གསོས་ཡོད་ལ
ངའི་ཚེ་སྲོག་ལ་རིན་ཐང་སྦྱིན་པས
ང་སྔར་བཞིན་གདོང་ལ་ཐོན་ཡོད

འབྲུག་ཡུལ་འབུམ་ཐང་ནས་ཟིན་བྲིས་སུ་བཏབ།
༢༠༡༣་༡༠་༤